O Conselleiro de Sanidade, Antonio Gómez Caamaño, reivindicou a necesidade dun acceso igualitario ao cribado neonatal en todo o estado para garantir un acceso igualitario no acceso en probas de detección temperá como a do talón, que salvan vidas.

O compromiso da Consellería de Sanidade co cribado neonatal permite detectar nos bebés 37 patoloxías conxénitas primarias e outras 14 secundarias, sumando en total 51. Mentres, a carteira básica do Sistema Nacional de Saúde recolle unicamente 11 patoloxías.
O éxito do cribado galego constátase coa participación do 99,9 % das familias e o diagnóstico de máis de 700 patoloxías en máis de 476.000 bebés cribados desde o ano 2000 a 2024. Así, foron detectadas de forma precoz enfermidades como hipotiroidismo conxénito ou a fibrose quística.
Galicia tamén está a liderar o proxecto Cringenes, coa catedrática Luz Couce, directora da Unidade de Diagnóstico e Tratamento de Enfermidades Metabólicas Conxénitas do Complexo Hospitalario Universitario de Santiago de Compostela. Neste proxecto participan 2.500 bebés de nove comunidades autónomas e busca ampliar o cribado actual coa secuenciación xenómica co obxectivo de diagnosticar enfermidades que actualmente non dispoñen de marcadores.

A Consellería de Sanidade puxo en marcha en decembro un novo cribado para detectar cardiopatías conxénitas críticas nas primeiras 24 horas de vida. Neste caso, a través dunha proba indolora como é unha pulsioximetría pódense detectar patoloxías que causan preto do 20 % das mortes en período neonatal.