O Camiño de Santiago expande as súas fronteiras e visita a cidade chinesa de Shangai. Este sábado pódese visitar unha instalación con paneis informativos e materiais lúdicos sobre as rutas xacobeas, que permitirá afondar na súa transcendencia e nos seus atractivos turísticos e espirituais co fin de cautivar o mercado chinés.

A estrutura localizarase no exterior da sede do Instituto Cervantes en Shangai, situada na rúa Anfu no distrito Xuhui, unha das principais arterias comerciais e turísticas da cidade. Deste modo, calquera persoa que transite por esta vía poderá visitar o stand, que conta con imaxes dos principais fitos do Camiño, así como indicacións, mapas e contidos cos que afondar na historia e no peso actual dos itinerarios xacobeos.

A acción é o resultado da colaboración entre Turismo de Galicia e Turespaña. A cidade acollerá a ITB China Shanghai 2025, que se desenvolverá entre os días 27 e 29 de maio. O evento configúrase como unha das principais citas profesionais do sector de viaxes.

O peso de visitantes de fóra de España no Camiño de Santiago está a experimentar un auxe nos últimos anos. Como exemplo, en 2024, un 58% das 499.241 persoas que recolleron a Compostela eran estranxeiras. A tendencia mantense no que vai de 2025: un 55% de visitantes chegaron de fóra das fronteiras españolas, cun total de 33.403 camiñantes estranxeiros.