O IV Encontro do alumnado das escolas de arpa de Galicia celebrouse esta mañá no Liceo de Noia no marco da 12ª edición do Noia Harp Fest. Máis de 20 estudantes de diferentes escolas do país participaron nunha xornada moi especial, na que interpretaron xuntas pezas da tradición bretoa e galega arranxadas ex profeso para a ocasión por Kevin Le Pennec e Rodrigo Romaní. 

O evento, no que participaron estudantes da Escola Municipal de Música Folk e Tradicional ETRAD de Vigo, da Escola Municipal de Música de Santiago, do Conservatorio de Torroso (Mos), do Conservatorio das Artes Mayeusis (Vigo) e da Barreiro Arpa Escola (Vigo), contou coa asistencia do arpista bretón. «Para o alumnado é unha experiencia insual que un artista como Kevin Le Pennec arranxara unha peza especial para a ocasión, e máis aínda que tocase tamén con elas sobre o escenario do Liceo», expón Rodrigo Romaní. 

Desde xeito, o Encontro do alumnado das escolas de arpa de Galicia despídese até o ano que vén, e consolídase como unha cita anual imprescindible na axenda tanto dos centros como dos seus estudantes, «pois é moito máis que un concerto en común: é unha xornada única de convivencia e intercambio”, apunta Romaní.