A tradición artesanal volve cobrar vida en Chantada coa nova edición do curso Fibranzas. Laboratorio das fibras vexetais, unha proposta formativa que pon o foco na recuperación e actualización dos oficios tradicionais ligados ás fibras naturais. Esta iniciativa enmárcase no programa Aprender da Tradición. Oficios e técnicas, impulsado pola Fundación Artesanía de Galicia co obxectivo de revitalizar o sector artesanal, garantir a remuda xeracional e atraer novos talentos cara ao mundo da artesanía.

O curso Arte contemporánea e fibras: Unha produción artística, impartido pola artista Sonia Navarro en colaboración coa recoñecida artesá Idoia Cuesta, constitúe o terceiro dos catro módulos que conforman esta acción formativa. A proposta combina creación contemporánea e técnicas tradicionais nun espazo compartido por cesteiros, deseñadores e artistas, que traballan desde a recolección das fibras vexetais ata o deseño e produción de pezas artesanais.

Esta terceira etapa do programa arrancou no mes de xullo cun módulo sobre arte da paisaxe a cargo dos creadores daneses Jette Mellgren e Jan Johansen. O cuarto e último módulo, previsto para os días 15, 16 e 17 de outubro, estará centrado na cestería de colmo, unha técnica ancestral que emprega palla de centeo, trigo e outras especies vexetais como xesta ou liño. Esta parte será dirixida por Álvaro M. Leiro, Premio Nacional de Artesanía 2023. Como broche final, o deseñador Miguel Leiro liderará os días 25, 26 e 27 de novembro a fase de creación de prototipos e deseño de coleccións inspiradas nas técnicas aprendidas.

O programa Aprender da Tradición, pioneiro en España desde a súa posta en marcha en 2023, estrutura a súa acción arredor de dúas liñas principais: por unha banda, aposta pola formación práctica e especializada de novos perfís, garantindo así a continuidade dos oficios tradicionais; por outra, ofrece capacitación avanzada aos artesáns en activo, contribuíndo á súa profesionalización e á mellora da calidade e comercialización dos seus produtos.

Con esta nova edición de Fibranzas consolídase como un referente na recuperación e posta en valor da artesanía galega, convertendo a tradición nun motor de innovación cultural, económica e social para o rural galego.