A capital galega converterase, un ano máis, no epicentro da cultura urbana e dos deportes extremos coa celebración do Compostela Street Festival, un evento que busca consolidarse como un dos máis relevantes a nivel estatal neste ámbito. A cita será os días 19, 20 e 21 de setembro no Campus Sur Universitario da USC, un emprazamento privilexiado que acollerá unha programación vibrante, diversa e totalmente gratuíta.

O festival reunirá a preto de 500 competidores que participarán en máis de dez disciplinas urbanas, con probas internacionais, nacionais e autonómicas. Destacan competicións como o Campionato Internacional de Street Workout, o Campionato de España de Breaking, e outras modalidades como Skate, Beatbox, Freestyle ou Basket 3×3, entre outras.

Pero o Compostela Street vai máis alá do ámbito deportivo. A súa proposta cultural abrangue concertos de música urbana, exhibicións e certames de Street Art, ademais de obradoiros e espazos de participación libre como os “Open Parks”, nos que se instalarán estruturas como un PumpTrack (para BMX, Skate, Roller e Scooter), un Parkour Park e unha Gaiola de Street Football.

O lecer tamén terá un papel destacado co Street Studio, un estudo de gravación e produción musical, a Street Barber, unha zona gastro con Foodtrucks e un Street Market, que estarán situados no perímetro do estanque do campus, moi próximo ás pistas deportivas.

Máis alá do espectáculo e da competición, o Compostela Street Festival preséntase como un espazo inclusivo, diverso e multicultural, cun firme compromiso coa igualdade e a participación, aspirando a posicionarse como un referente internacional dentro dos festivais de cultura urbana.

A cidade prepárase para acoller unha nova edición dun evento que non só enche de vida as rúas de Compostela, senón que tamén promove valores de convivencia, creatividade e integración a través da cultura urbana.