O alumnado do CIFP Imaxe e Son reivindicou un “teatro na EIS xa” tra-la estrea de Culpables de ser, un musical inspirado no universo literario de Circe de Begoña Caamaño, figura homenaxeada nas Letras Galegas 2026.
O espectáculo é un proxecto final de ciclo que revisita a mitoloxía clásica dende o punto de vista das mulleres que foron silenciadas pola historia, e tivo que estrearse no Fórum Metropolitano debido á falta dun teatro propio dende hai xa dous anos.
O alumnado que puxo en escea o musical é o que actualmente estuda segundo, e está a piques de rematar o seu paso pola escola sendo a primeira xeración que non conta cun teatro dotado do equipamento de iluminación, son e imaxe fundamental para poner en práctica os contidos dos ciclos superiores de produción de audiovisuais e espectáculos; realización de proxectos audiovisuais e espectáculos; Iluminación,captación e tratamento de imaxe e son para audiovisuais e espectáculos.
O proceso de ensaios e preparación de todalas prácticas dos módulos de espectáculos vense limitadas pola falta de espazos e materiales técnicos de traballo. A comunidade educativa da Escola de Imaxe e Son trata de suplir con talento e imaxinación a carencia dunhas instalacións imprescindibles para unha formación profesional de calidade, pero estas xeracións de alumnado perderanse contidos e experiencias fundamentais para a súa preparación.
“Poderían os alumnos da formación profesional de hostalería formarse axeitadamente sen unha
cociña? Podedes imaxinar a facer un moble sen unha carpintería?” cuestionan dende o centro
no que se levan 34 anos formando os profesionais do audiovisual de Galicia.

5 anos de promesas incumplidas da Consellería de Educación
A Escola de Imaxe e Son contaba cunha infraestructura vella que precisaba dunha renovación.
Unha obra que se iniciou hai dous cursos e se paralizou por problemas entre a Consellería de Educación e a empresa adxudicataria, deixando un furado no edificio e as instalacións e equipacións técnicas de iluminación, son e rexidoría sen poder empregarse dende entón.
A obra do teatro foi un compromiso da Consellería de Educación dende o ano 2020. Nun proceso administrativo longo, unha enxeñaría realizou un estudo técnico e un orzamento da intervención, tras o cal a Consellería licitou a obra. Unha vez adxudicada a unha empresa, non se puido iniciar a execución porque non se contaba aínda coa licenza de obra do Concello nin coa de AENA, que tardaron varios meses en concederse. Cando finalmente se obtiveron, a empresa adxudicataria renunciou, pois xa tiña comprometidas outras obras.
A Consellería tivo que convocar unha nova licitación, o que supuxo outro atraso. En 2023, as obras comezaron finalmente, retirando o patio de butacas e o revestimento do teatro. Nese momento, detectouse que o informe da enxeñaría inicial non contemplaba certas dificultades técnicas, como a necesidade de retirar manualmente o encofrado, entre outras cuestións. A empresa comunicou entón á Consellería que o orzamento debía incrementarse de forma considerable. A unidade técnica da Consellería desprazouse ao centro para verificar a situación e informou de que estaban a negociar unha contraoferta coa empresa para poder continuar coa execución. Dende entón, o único que hai no CIFP Imaxe e Son respecto do teatro e incentidume, xa que a Consellería dí non saber aínda se a empresa aceptará as novas condicións, e, en caso contrario, habería que proceder a unha nova licitación, o que implicaría un novo atraso. O feito é que dende maio de 2024 a comunidade educativa conta cun buraco no canto dun teatro, e ausencia de solucións dende a Consellería.