O Paseo da Ferradura, na Alameda de Santiago, acollerá este sábado distintas actividades de ocio programadas pola Rede de Centros Socioculturais para conmemorar o «Día Internacional do Dereito ao Xogo«. A partir das 11:00 horas, nenos e nenas poderán gozar co circuíto de xogos tradicionais, de habilidade e cooperativos, así como co espectáculo «Cantaxoga» de Migallas.
O programa de actividades arrancará ás 11 horas na Alameda, onde a cativada poderá gozar de xogos tradicionais, inchables e flocos de millo. Ás 12:30 horas terá lugar a lectura do artigo 31 da «Convención sobre os Dereitos da Infancia», no que se pon de manifesto que «xogar é un dereito«.

O «Día Internacional do Dereito ao Xogo» conmemórase o 28 de maio co obxectivo de recordar en todo o mundo que o xogo é recomendable para todas as persoas, non importa a idade, e de forma fundamental para a infancia pola súa relevancia na educación e no desenvolvemento dos nenos xa que fomenta a súa creatividade e curiosidade e favorece a xestión das emocións, así como o desenvolvemento das súas habilidades sociais, entre outras moitas cousas.