Carmelamola inaugura o sábado a tenda do seu obradoiro de bixutería artesanal. Aos seus 23 anos, Carmen Álvarez é a primeira persoa con síndrome de Down en abrir unha tenda e convertirse nun exemplo de autoemprego, de emprendemento e de inclusión laboral dentro de Artesanía de Galicia,marca da que forma parte Carmelamola dende o ano 2023.

A súa relación coa artesanía, que comezou inicialmente como medio para mellorar a súa destreza coas mans, axiña se converteu nunha afección a través da bixutería e, máis tarde, nun proxecto profesional que non para de medrar. Así, empezou vendéndolle pezas ao seu círculo máis próximo e hoxe conta cunha exitosa tenda online e seguidores a través das
redes sociais en diferentes partes do mundo.

A partir do sábado estará aberta a súa tenda física, que xa se inaugurou de xeito oficial, no local 12 do Mercado de San Agustín.

Recoñecementos
No ano 2018 Carmelamola quedou finalista na categoría de deseño de xoias do programa Xuventude Crea. Un ano máis tarde, gañou o premio eWoman Coruña ao mellor negocio online que concede o grupo Prensa Ibérica e resultou finalista nos premios Yo Participo, da Fundación Garrigou. En 2020 recibiu o premio Emprende na categoría de
Responsabilidade Social Corporativa que promove AJE A Coruña e, en 2022, a Confederación Nacional de Centros Especiais de Emprego recoñeceu o seu traballo co premio á integración laboral das persoas con discapacidade.