Hoxe clausurouse o obradoiro de emprego dual Portas de Galicia IV, unha iniciativa que contou cunha achega de 412.000 euros por parte da Xunta de Galicia e que reuniu os concellos de Vilariño de Conso, Viana do Bolo e A Gudiña.

O obradoiro, que tivo unha duración de nove meses, permitiu que 20 persoas se formasen ao tempo que desenvolvían un traballo remunerado en actividades de utilidade pública e interese social. No caso concreto deste proxecto, os traballos centráronse na conservación e mellora de montes, así como en tarefas de albanelería relacionadas con fábricas e cubertas.

Entre as actuacións realizadas destacan, en Vilariño de Conso, a reforestación en zonas afectadas polos incendios, labores silvícolas na área recreativa e nos xardíns municipais, a rehabilitación dun muíño en Entrecinsa e a recuperación de elementos patrimoniais como a forxa en Chaguazoso ou o muro en San Cristovo.

Na Gudiña, as accións incluíron intervencións silvícolas no Camiño de Santiago e melloras nunha nave almacén municipal. Pola súa banda, en Viana do Bolo, os participantes executaron labores forestais en diversos puntos do concello, ademais da reparación de beirarrúas na rúa Nicolás Tenorio e a obra civil para a canalización de gas.

Este obradoiro é un dos dez que se clausuran estes días na provincia de Ourense, todos eles centrados en tarefas forestais e silvícolas, nun contexto especialmente relevante pola elevada incidencia dos incendios forestais nesta zona. O conselleiro sinalou que estes programas terán continuidade nas vindeiras convocatorias.

O Portas de Galicia IV forma parte dos 87 obradoiros duais financiados pola Xunta na convocatoria do ano pasado, cun investimento total de máis de 36 millóns de euros. Só na provincia de Ourense desenvolvéronse 27 destes programas, que combinan formación teórica con traballo práctico e remunerado.

O goberno galego subvenciona tanto a posta en marcha dos talleres como a contratación do alumnado-traballador, priorizando a atención a colectivos con maiores dificultades de inserción laboral, como mulleres, persoas con diversidade funcional, retornados ou vítimas de violencia de xénero. Os ámbitos de actuación inclúen os servizos sociais e comunitarios, a formación forestal ou a recuperación do patrimonio histórico e cultural.