A Real Academia Galega e PuntoGal celebrarán o luns, 22 de xuño, ás 11:30 horas, na Fundación Luis Seoane (San Francisco, 27 – A Coruña) a entrega dos premios do IX Concurso de microrrelatos. A membro da executiva da RAG María López-Sández, o presidente de PuntoGal, o tamén académico Manuel González, e Ana Cermeño, en representación da revista Luzes (entidade colaboradoradora), entregaranlles os galardóns e os diplomas ás nove persoas gañadoras e ás seis finalistas.

Na modalidade de persoas adultas as gañadoras son Sonia Corral Franco (As Pontes, 1979), veciña de San Sadurniño; Marcos Taracido (Pontevedra, 1971), residente en Teo; e Lara Costas Lago (Redondela, 2004). En xuvenil, Iria Iglesias Mouriño, alumna do IES Antonio Fraguas de Santiago de Compostela; Juan Domínguez de la Torre, do CPI Arquitecto Palacios de Nigrán; e Uxía Nogueira Bodega, do IES de Meaño. En infantil as premiadas son Smahan Essaidi, alumna do noiés CEIP Alexandre Rodríguez Cadarso; Carla Merino Suárez, do CEIP Xesús Golmar de Lalín; Laura González Martínez, alumna de Las Acacias de Vigo.