As novas escavacións arqueolóxicas previstas na Casa da Sinagoga, un inmoble histórico cun importante valor patrimonial e cultural, situado na Cidade Vella coruñesa, e que está a ser obxecto de investigación polo seu simbolismo e os restos achados nos últimos anos están a piques de comezar.
A intervención na planta de abaixo, motivada polas sondaxes efectuadas hai dous anos, busca determinar a importancia dos materiais arqueolóxicos que, se presupón, habería nesta parte da casa, adquirida no pasado mandato para incorporala ao patrimonio municipal e, desta forma, avanzar con vistas á súa musealización.
As obras na Casa da Sinagoga adxudicáronse ao equipo de Simón Pena Basso, que será o encargado de realizar a escavación na área da superficie definida no proxecto, para descubrir os restos non visibles e identificar as súas características.
As actuacións previstas pasan, en primeiro lugar, por traballos de estabilización na forxa, a instalación de tubaxes provisionais que recollan as augas pluviais do patio e, ademais, a escavación arqueolóxica en si mesma, que se executará sobre unha superficie de 104 metros cadrados, indo, paso a paso, por niveis estratigráficos. O obxectivo é profundar na historia do inmoble e, desta forma, ampliar a información existente sobre a evolución no tempo do corazón histórico da cidade herculina.
Os novos traballos na Casa da Sinagoga, cofinanciados con fondos do Ministerio de Industria e Turismo, suporán un investimento de máis de 50.000 euros.