No Castro de Elviña da Coruña está previsto acometer melloras de accesibilidade na contorna da entrada principal ao recinto.
As obras, adxudicadas recentemente á empresa López y Leis, que contarán cun investimento superior aos 150.000 euros centraranse en acondicionar o acceso a un dos principais emblemas da rede de Museos Históricos da Coruña, onde tamén se prevé efectuar tarefas específicas para mellorar as condicións de visita. Estas accións enmárcanse no plan para pór en valor o Castro de Elviña, onde actualmente están en execución dúas intervencións máis: por un lado, a execución do centro de apoio ás actividades arqueolóxicas e didácticas e, por outro, a creación do novo valado perimetral que rodea o xacemento, clave para reforzar a súa protección e coidado.