O vindeiro martes 7 de abril, ás 20.00 horas, a Fundación Luis Seoane será o escenario dun diálogo entre dúas das figuras máis transgresoras da escena actual: Rodrigo Cuevas e Nuno Pico, a alma detrás de Grande Amore. Este encontro servirá como antesala para o esperado concerto de Rodrigo Cuevas no Coliseum o próximo 30 de abril, a que será a súa única data en Galicia este ano. As entradas para a súa actuación continúan á venda en Ataquilla e no despacho de billetes da herculina praza de Ourense.

Na Seoane, o público poderá ser testemuña dunha conversación honesta e imprevisible sobre tradición, identidade e a electrónica como ferramenta de axitación social. Rodrigo Cuevas (Oviedo, 1985) chega á Coruña xa consagrado no panorama musical español tras recibir o Premio Nacional das Músicas Actuais en 2023 polo seu inusual universo onde o folclore conversa co cabaret e a electrónica. Tras o éxito de ‘Manual de Romería’ (Mellor Disco Nacional por Rockdelux), o artista presenta agora ‘Manual de Belleza’, o peche dunha triloxía que redefiniu a música popular en España.

Este novo traballo preséntase como un exercicio de etnografía pop, onde Cuevas reivindica a beleza non normativa —a das mans calosas e a dignidade do rural— a través dun son que funde pandeiros e acordeóns cunha electrónica de vangarda que bascula entre o ambient e o techno. Os seus directos convertéronse en auténticos rituais modernos onde o folclore se abraza coa cultura queer.
O encontro do 7 de abril será unha oportunidade para profundar nas ideas de dous creadores que souberon converter a tradición en algo moderno e emocionante. A entrada será libre ata completar capacidade.